Мерапрыемствы Тыдня роднай мовы “Як ты дорага мне, мая родная мова!” Літаратура як люстэрка мовы

22 верасня на літаратурную сустрэчу з вучнямі завітаў Алесь Мікалаевіч Казека - беларускі паэт, старшыня Магілёўскага аддзялення Саюза пісьменнікаў Беларусі. Алесь Мікалаевіч расказаў пра свае шляхі-дарогі: пра тое, што яго дзяцінства прайшло на Магілеўшчыне, пра тое, дзе і якую ён атрымаў адукацыю, як самаааддана служыў, каб толькі не было вайны, пра тое, што частку свайго жыцця правёў далёка за межамі Беларусі, як імкнуўся на Радзіму, у родны куток, дзе так лёгка на душы і спакойна сэрцу.

Беларусь мая родная, Маці-зямля!
Да вытокаў тваіх жыватворных крыніцаў
Мне б прыпасці, нібы да грудзей немаўля –
Прад табой спавядацца, табе пакланіцца.

Вучні таксама падрыхтаваліся да сустрэчы з Алесем Мікалаевічам. Яна загадзя пазнаёміліся з яго творамі, а некаторыя вывучылі на памяць: “Я – маленькая кропля з крыніцаў святых...”, “Я кожны міг імкнуся да цябе...”, “Беларусь мая родная”, што стала прыемным падарункам для паэта.

Паміж вучнямі і паэтам завязалася цёплая размова. Хлопчыкі і дзяўчынкі цікавіліся, у якім узросце Алесь Мікалаевіч пачаў пісаць вершы і на якой мове, як адбываецца працэс напісання твораў, ці можна стаць паэтам або гэта талент ад нараджэння, якія праблемы хвалююць сучасных паэтаў і што самае галоўнае ў творчасці.

У канцы сустрэчы навучэнцы абступілі паэта, прасілі напісаць для іх пажаданні, а, атрымаўшы аўтограф, вельмі радаваліся.

Як прыемна знаёміцца з творчасцю таленавітых людзей ад іх саміх! І праз літаратуру мова становіцца бліжэй кожнаму.